Мэта

Здабывайце рэсурсы на набыцьцё розных збудаваньняў і картак разьвіцьця, і намагайцеся першымі здабыць 10 пунктаў (у пашырэньні „Гарады і рыцары“ — 13).

Расклад

• Гульнявая дошка складаецца з пагоркаў (цэгла), лесу (драўніна), гораў (руда), палёў (збожжа), пашаў (воўна) і пустыні (нічога), выстаўленых выпадкова.
• Кожнай тэрыторыі, апрача пустыні, нададзены нумар ад 2 да 12. На пустыні разьмяшчаецца збойца.
• Кожны гулец выстаўляе на дошку 2 паселішчы і 2 дарогі побач зь імі, тады атрымлівае рэсурсы з кожнай тэрыторыі вакол другога паселішча.

Хада гульні

Фаза вытворчасьці (абавязковая): на пачатку ходу кіньце 2 цыркі і падлічыце суму.

• Усе тэрыторыі з такім нумарам вырабляюць рэсурсы для ўсіх гульцоў, якія маюць побач паселішчы ці гарады (калі іх не заблякаваў збойца): 1 рэсурс за паселішча і 2 за горад.
• Калі на цырках выпала 7, рэсурсы не вырабляюцца. Замест гэтага ўсе гульцы, якія маюць на руках 8 і больш рэсурсаў, мусяць аддаць палову зь іх у банк (з акругленьнем у меншы бок). Збойцу трэба перамясьціць на іншую тэрыторыю і скрасьці 1 выпадковы рэсурс у гульца, які мае паселішча ці горад побач з гэтай тэрыторыяй.

Гандаль (добраахвотна): можаце гандляваць рэсурсамі

• зь іншымі гульцамі (унутраны гандаль)
• з банкам (заморскі гандаль) па курсе 4 аднолькавыя рэсурсы за 1 з банка. Калі вы пабудавалі порт, то можаце гандляваць па курсе 3:1.

Будаўніцтва (добраахвотна): пасьля можаце будаваць дарогі, паселішчы, пашыраць іх да гарадоў ці набываць карткі разьвіцьця, разьлічваючыся патрэбнымі рэсурсамі.

• Дарогі мусяць выходзіць з паселішчаў і каштуюць 1 цэглу + 1 драўніну (0 пунктаў перамогі)
• Паселішчы мусяць быць злучаныя дарогамі між сабой (за выключэньнем стартавых) і каштуюць 1 цэглу + 1 драўніну + 1 воўну + 1 збожжа (1 пункт перамогі)
• Гарады будуюцца замест паселішчаў і каштуюць 3 руды + 2 збожжа (2 пункты перамогі)
• Карткі разьвіцьця (у пашырэньні „Гарады і рыцары“ адсутныя) каштуюць 1 руду + 1 воўну + 1 збожжа і ўключаюць
  • 14 картак Рыцараў, якія могуць перамясьціць збойцу на іншую тэрыторыю і скрасьці рэсурс
  • 2 карткі Будаўніцтва дарог, якія будуюць бясплатна дарогі
  • 2 карткі Году дастатку, якія даюць два бясплатныя рэсурсы на выбар
  • 2 карткі Манаполіі, якія дазваляюць забраць ва ўсіх гульцоў адзін від рэсурсаў
  • 5 картак Пунктаў перамогі

Карткі разьвіцьця можна гуляць ў любы час свайго ходу, у тым ліку перад кіданьнем цырак, але толькі што набытыя карткі можна згуляць толькі з наступнага ходу. Карткі пунктаў перамогі паказваюцца толькі ў канцы гульні.

Падлік

• Паселішчы: 1 пункт перамогі кожнае.
• Гарады: 2 пункты перамогі кожны.
• Карткі пунктаў перамогі: 1 пункт перамогі кожная. Схавайце іх, пакуль не набярэце сумарна дастаткова пераможных пунктаў.
• Найвялікшае войска: гулец, які выкарыстаў найбольшую колькасьць картак рыцараў (мінімум 3) атрымлівае картку найвялікшага войска, вартую 2 пункты. У „Гарадох і рыцарах“ адсутнічаюць.
• Найдаўжэйшая дарога: гулец з найбольшай неразрыўнай дарогай (мінімум 5 кавалкаў) атрымлівае картку найдаўжэйшай дарогі, вартую 2 пункты.

Гэтую картку можна адабраць, пабудаваўшы даўжэйшую дарогу.

Канец гульні

Першы гулец, які на сваім ходзе дасягне 10 ці больш пунктаў перамогі (з улікам картак разьвіцьця), паказвае іх і перамагае ў гульні. У „Гарадох і рыцарах“ для перамогі патрэбныя 13 пунктаў.

Варыянты

• Лёгкі пачатак: у першыя 2 хады гульцы перакідаюць цыркі, калі на іх выпалі 7-кі. У пашырэньні „Гарады і рыцары“ дадаткова пры гэтым не перакідваюцца цыркі падзеяў.
• Міралюбны збойца (толькі ў асноўнай гульні): збойцу нельга перамяшчаць на тэрыторыю, прылеглую да паселішча гульца, які мае толькі 2 пункты перамогі. Калі прыдатнай тэрыторыі няма, збойца перамяшчаецца на пустыню і рэсурсы ні ў каго не забірае.

Гарады і рыцары

Цыркі падзеяў

• Дадаткова падчас кожнага ходу кідаюцца цыркі падзеяў.
  • Калі выпадае карабель (3 грані), барбарскі карабель набліжаецца да Катану на 1 кратку. Калі ён дойдзе да апошняй (7-й) краткі, барбары нападаюць.
  • Калі выпадае гарадзкая брама (сіняя/зялёная/жоўтая), гульцы цягнуць картку прагрэсу, калі колер брамы і чырвонай цыркі супадае зь іхнім колерам.
• Кожны гулец адначасна можа мець да 4 картак прагрэсу. Карткі пунктаў перамогі гуляюцца адразу і ня ўлічваюцца ў падліку. Падобным чынам можна гуляць іншыя карткі разьвіцьця.
• Калі барбары нападаюць, то маюць сумарную сілу 1 за кожны горад/мэтраполію ўсіх гульцоў. Сіла арміі абаронцаў складаецца з сілы ўсіх актыўных рыцараў.
  • Калі барбары мацнейшыя, то рабуюць горад гульца з найменшай колькасьцю актыўных рыцараў, пераўтвараючы яго ў паселішча. Муры вакол горада таксама разбураюцца.
  • Калі абаронцы мацнейшыя ці аднолькавыя сілай, гулец з найбольшай колькасьцю актыўных рыцараў атрымлівае картку „Абаронцы Катана“, вартую 1 пункт перамогі. Калі такіх гульцоў некалькі, то замест гэтай кожны зь іх атрымлівае картку прагрэсу.
  • У любым выніку барбарскі карабель вяртаецца на пачатковую пазыцыю, і ўсе рыцары становяцца неактыўнымі.

Гарады

• Калі горад вырабляе воўну/драўніну/руду, то замест аднаго з гэтых рэсурсаў вырабляе тавар (адзеньне/паперу/манэты).
• Дзьве дадатковыя пабудовы:
  • Гарадзкі мур можна будаваць вакол існага горада. Будоўля каштуе 2 цагліны (0 пунктаў перамогі). Адзін гулец можа мець ня больш за 3 гарадзкія муры, і кожны зь павялічвае максымальную колькасьць картак, якую збойца ня можа забраць з рук пры выпадзеньні 7-кі, на 2.
  • Рыцары мусяць злучацца дарогамі і каштуюць 1 воўну + 1 руду (0 пунктаў перамогі). Пачынаюць неактыўнымі са значэньнем 1, але могуць быць палепшаныя за 1 воўну + 1 руду (да 2 разоў) ці актываваныя за 1 збожжа.
• Актыўныя рыцары любой моцы могуць выканаць на вашым ходзе 1 дзеяньне. Іх можна перамяшчаць па вашых дарогах да іншага скрыжаваньня, да слабейшага рыцара суперніка (каб змусіць яго адступіць ці зьнікнуць), альбо да збойцы, каб сагнаць з краткі яго (як у выпадку з рыцарам). Пасьля гэтага яны становяцца неактыўнымі.
• Гарады можна разьвіваць у гандлі (жоўты)/палітыцы (сіні)/або навуцы (зялёны), аплачваючы за кожны ўзровень 1 адзеньне/паперу/манэту.
  • 3-е паляпшэньне дае дадатковую здольнасьць: абмяняць 2 аднолькавыя тавары на рэсурс аднойчы на ход (гандаль); палепшыць рыцара да значэньня 3 (палітыка); узяць любы рэсурс, калі не атрымалі рэсурсаў і не было збойцы (навука).
  • Першы гулец, які здабудзе 4-е паляпшэньне ў кожнай з галінаў, можа паставіць замест гораду Мэтраполію. Кожная зь іх вартая 4 пунктаў перамогі і непрыступная для барбараў.

Варыянты

• Паганыя бітвы: калі барбары высаджваюцца, то гульцы па чарзе абвяшчаюць, колькі сваіх актыўных рыцараў хочуць выставіць на абарону Катану.
• Бадзяжны рыцар: перад кіданьнем цырак гулец можа скарыстаць актыўнага рыцара, каб прагнаць збойцу, так як у звычайным Катане гуляецца картка рыцара.